Roztomiło Familijo Internetowo!

Prziszla Wilijo- dziyn, na kiery czekajom bez colki rok mlodzi i starzi. My z Erwinym tyz- chocioz momy swoje lata ,radujymy sie jak dzieci.

Juz od rana we wszystkich domach poczyno sie ostatnie rychtowanie do swiont. Nikierzi w tyn dziyn strojom goiki, bo taki bol u nich od wdycki zwyczaj. U inkszych jest juz gotowy i swiyci roztomajtymi farbami. 

Z kuchniow wonio jak diosi. Warzy sie mak, moczka i kapusta z grochym. Po miescie chodzi juz niywiela ludzi. Co bolo do kupiynio, to juz pokupowali wczesnij. W autobusach, sklepach i na chodnikach slychac co chwila glosne....wesolych swiont !!!. Jedyn drugimu zyczy wszystkigo nojlepszego. Listonosze z bachratymi taszami roznoszom ostatnie karty swionteczne. Wyslali je nom przociele z colkij Polski i reszty swiata. Tych kart bola pewnikym srogo holda. Czy to niy je piykne ? Miliony dobrych zyczyn  - tych wypedzanych i napisanych ze szczyrego serca. Bo przeca w tych godnych swiyntach niy som nojwazniyjsze gyszynki, choinka i swiateczne jodlo. 

Rozchodzi sie o to, zeby chocioz bez te pora dni ludzie zrobiyli sie inksi - lepsi dlo sia.

Niy godzi sie przeca przi wilijnym stole siedziec z zabuczalom gymbom i zlosciom dlo drugigo czlowieka. Po to stawio sie przi jodle talyrzik z biolymi oplatkami, zeby przipominaly nom piyrszych chrzescijan. I tak jak loni han dowiyn downo, zbiyrali sie do kupy przi jednym stole, zeby przelomac sie chlebym, tak i my dzisioj bydymy dzielic oplatki miedzy rodzina i nojblizszych. Kto mo jakosc zlosc na drugigo, musi mu przi tymu oplatku wyboczyc. Inakszyj, te dzielynie i zyczynia niy mialyby cweku. 

Wilijo to przilezytosc do pogodzynio sie ze wszystkimi. Mozno nikierym zdo sie to za ciezkie, jak mo sie z drugim pogodzic. Ale styknie, ze w rece ostanie mu konsek odlomanego oplatka, a wszystko zaroz wydowo sie leksze. Bestoz tymu oplatkowi nolezy sie wielkie powozanie.

Z tych naszych wilijnych obyczajow niywiela juz ostalo. Malo kiery mo dzisioj postawiono w doma betlyjka. A przeca piyrwyj stola w kozdyj biesiadnyj izbie. Chnet colki adwynt bajstlowali je chopcy ze swojimi ojcami. Boly roztomajte - z papyndekla, szperplaty i slomy. Co kto miol, z tego robiyl. Blank downo niy strojylo sie u nos goikow. Dowalo sie za to do wszystkich kontow izby sloma, a pod serweta siano. Miastowe ludzie niy mieli slomy , to na wilijny stol stwiali w szklonce piykne kloska z pszynicy, owsa i rzy. Szlo je kupic przed swiyntami na torgu. Dzisiok ani tego niy momy, bo siedloki zniwujom kombajnami. Skirz tego niy idzie tyz zrobic piyknych lancuchow na choinka, bo ku tymu trza sztajfnyj slomy. 

No, ale teraz i tak goiki stroji sie po nowyj modzie. Kto by tam wiyszol orzechy w pozlotce, bombony, serca piernikowe czy papiorzane aniolki ? Kupuje sie gotowe blyskotki, kierych w sklepach je ogromnie moc. Niy idzie pedziec - som piykne i bogate, ale trocha zol, ze stare poszlo w odstowka. Downiyjsze goiki niy boly mozno takie szumne, ale za to  zocniyjsze. Jeszcze po dzisioj mom skowane we krzince papiorzane lancuszki i gwiozdki, zrobione malymi raczkami naszych dziecek. Za pora godzin nastanie wieczor. Wszyscy siednymy z familijami przi wilijnych stolach. Bydymy se zyczyc zgody i pokoju na swicie. Bez tego przeca niy ma ani szczescio ani radosci.

Otwórz proszę prezenty
posłuchaj jak grają choinkowe bombki!

Kolędy w wykonaniu Chóru Katedralnego w Katowicach:

Kolęda I, Kolęda II, Kolęda III, Kolęda IV

Bajki zrealizowano w Radiu PLUS Katowice
ks. Piotr Wilk i Barbara Michalik
Wszelkie prawa zastrzeżone

Kolędy w wykonaniu Zespołu Krebane.
Polonia Records vol.17
oraz Chóru Katedralnego w Katowicach
wykorzystano za zgodą

"Ślonskie Beranie" - Bytlejka 2000

ProMARCOS
http://www.gornyslask.pl