Witejcie Ludkowie,
zbliżajom nom sie Śwjynta Wielkanocne. Rychtujymy sie do tego wszyscy. Pucujymy łokna,
pierymy gardiny i pozbywomy sie zimowych kurzof. Ale fto to jesce pamjynto jak to kejsik
boło. Tos terozki chca se tak trocha powspominać. Wy modzi spytejcie sie starzykow, to wom
pedzom jak we Wjelki Pjontek leciało sie wcas rano do żdżodła coby sie umyć. We
Wjelko Sobota nase matki warzoły jajca we cebuli po to coby sie zafarbjoły. Tak ze tych
jajec robjoło sie kroszonki. Po tym te kroszonki trza było jesce pomalować. Tak to sie
nazywało, ale tak na prowda to sie te kroszonki wydropywało czymś łostrym we jakeś
pjykne wzory. Ale nojwjynkszo uciecha do dzieci boła jak sie we Wjelko Sobota przyszło
nazod ze Kościoła. Leciało sie wtedy wartko do łogrodka szukać pod krzokami wjeprzkow
abo jagodkow, co nom nakłod zjoncek. A jak sie już znodło to boły to same maszkyty ze
ftorych my sie radowali a radowali. We pjyrwsze Śwjynto Wjelkanocne do śniodanio zawsze
boła szynka ze chrzanym, a po połedniu chopcy sie już rychtowali na poniedziałek.
Mjyszało sie woda ze perfinym coby tego do lonio dziołchow boło wjyncy. No i we druge
Śwjynto cyli we poniedziałek lotało sie sikać dziołchy, za co my dostowali kroszonki
abo inksze maszkyty. No tos na razie niech to bydzie tyla i trzymcie sie.
Wasz ujek Tomek
