Co byście naszo fajno ślonsko godka nie
zapomnjyli, naszkryflom Wom krotki listek.
U nos we Katowicach sie wiela zmjynioło i
furt cosik nowego sie widzi. Stare domy, co to je jeszcze za Winklerów i Grundmana
postawjyli tera pjyknie na nowo łobciepali i dopjyro tera idzie łobejrzeć jak to sie
downiyj ludziska starali, to co inkszego jak te nowe graniaste kszynki. A to jakoś gowa
przyłonaczono, a to jakisik gzims na łozdoba, abo jake kwjotki ze kamjynia nałobkoło
okien. 
Ludzie stojom, gymby
rozdziowiajom, mało co im gybis nie wyleci.
Tretuary wszyndy wyrychtowane, żodyn nie
bydzie jusz kromflekow łomoł. A geszefty momy tysz fajniste, kejby w Hameryce, idzie tak
bez cołki dzień łazić i łoglondać.
A biercie na tyn przykłod tako poczta.
Chałpa ta sama, ale jak sie wlezie to asik łocy porazi, som mesing i marmury a wszysko
sie blyszczy jak by to ftoś sidolem wypucowoł. Łokiynka tysz gryfne, a wszyndy małe
szezlongi ze siwyj skory aże by sie chciało na nich sie kantnonć. Nie chca Wos za bozna
robić, ale za pora lot nie poznocie nasze Katowice. Przyjeżdżejcie ludkowie a nie
pożałujecie.
