Ks. Olek

Strona główna Droga Krzyżowa

Fragmenty listów do Krzinki Klubowej o kiszyniowskim kosciele:

... Musza sie jeszcze z Wami podzielic jednom tu, naszom, moldawskom nowinom. Niydowno Lojciec Swiynty naznaczyl dlo Moldawii Biskupa. Do terozki my sam byli bez biskupa, ale teraz juz bydzie normalnie. Swyncynia biskupi bydom we Rzymie na Trzech Kroli w 2000. Biskupym lostol taki fajny karlus, co my sam do Moldawie prawie w tym samym czasie przijechali.

Nejprzod my ni mieli kaj miyszkac, to my se zrobiyli tako malo chalupka na cmyntorzu. Chodziyli my piechty do kosciola jakis cztyry kilometry. Potym urzondziyli my se razym taki male "miyszkani" we wiezy koscielnyj i tam my mieszkali pora lot. Jezdziyli my sam po okolicznych wioskach i udalo sie nom wybudowac pora kapliczek i dwa koscioly (nie bardzo wielki, ale zawsze to kosciol, a ni jakos chalupa). Dotond my zykali po chalupach, w izbach i kaj sie yno dalo.
Teraz juz je lepi. Wybudowali my tez sam, w Kiszyniowie normalno fara, kaj terozki miyszkomy. I lon teraz bydzie Biskupym Moldawskim.

Chcymy zorganizowac wyjazd do Rzymu na te swyncynia. A musicie wiedziec, ze niy je to taki leki zadani. Po piyrsze ludzie sam zarobiajom ok 30-50$ na miesionc, po drugi kozdy z moldawskim paszportym potrzebuje wiza do Wloch, po trzeci - znojsc tu porzondny autobus, co sie niy rozleci po drodze, to je wielko sztuka. Ale  obejrzymy - mozno sie to udo.

Z tym biskupym to je jeszcze jedna uciecha. Terazki byda farorzym w Katedrze. Niy umia se tego wyobrazic. Bo, ani ni momy sam do porzondku strojow do ministrantow, ani normalnych mikrofonow i glosnikow - som taki stare i sztyjc sie to psuje. Organy tyz by sie jaki nowe przidaly. Nic, bydymy kombinowac, bo jak to mo byc Katedra, to to zobowionzuje.

Terazki juz sie przigotowujymy do prziwitanio nowego biskupa: piszymy zaproszynia, trzaby tyz mu spatrzec jaki swiynte lobrozki skuli tego, cwiczymy nowe piesniczki. Ale musza Wom powiedziec, ze wszyjscy sie sam radujymy, bo to je historyczno rzecz - piyrszy w historii moldawski biskup.
Dziela sie z Wami tymi nowinami, bo je to we wercie, a mozno tyz ftos za tego nowego sam biskupa pozyko.

Pozdrawiom wszyskich serdecznie - przijymnyj niedzieli. Trzimejcie sie zdrowo. Sponboczkiym. Olek

 

 

Anton dziynkuja Ci bardzo za cieple slowa i chync pomocy. Musza jednak Ci pedziec, zebys w tym sklepje niy wiyszej zodnego ogloszynio. Yno se narobisz problymow - jak to przewiyzc, wiela tyn transport bydzie kosztowol, szofery tyz niy bardzo chcom jezdzic w te nasze strony. A jechac bez te granice - to ni ma nic z miodym, wiym cos o tym. Poza tym sam na miejscu te formalnosci - to je straszne, wierz mi.

Momy tu Caritas i przijyzdzajom czasym jakis transporty. Jo widza, jaki z tym je problym. A tak godajonc po prowdzie, to miyndzy ludziami to je potym nic yno zazdrosc, plotki i ostuda. W kazdym razie wielkie dziynki (Twoi tyz podzynkuj!). Musza Wom pedziec, ze my tu juz organizujymy, jak umiymy pomoc do tych najbiydniejszych. Na psziklad z moi parafi 100 tych, co juz som na pynzyji, majom kozdy dziyn cieply obiod. 15 km. od Kiszyniowa jest tako niewielko miejscowosc, tam som zakonnice z Polski - prowadzom przeczkole i tam tyz piyndziesiont dzieckow mo obiod.

Na poczontku szkoly dzieci tyz dostali blajsztifty i hefty, i mi sie zdaje, ze tyz cos slodkigo ku tymu. Ale to juz je wszysko robione przez oficjalne organizacje, kere musialy tu na poczontku przynsc tela papiorkowych formalnosci, zech im szczerze wspolczul - pomogajom, a jeszcze sam ich mynczom, jak jakich wrogow. Pytosz sie, jaki tu momy piniondze? Nazywajom sie: Leje, tak, jak w Rumunii, yno, ze to som moldawski leje; a "grosze" sie nazywajom: "bani".

Jak Francik pisol o ty zgodzie miyndzy ewangelikami i katolikami i jeszcze inkszymi, we Wisle, to mi sie trocha przipomnialy stare dzieje, bo musicie wiedziec, zech rok miyszkol pod Czantoriom - w Ustroniu Dobce, kole Jaszowca. Bylo to downo, jeszcze w syminarium. Mieli my w syminarium rok przerwy - po trzecim roku studiow, kozdy musiol isc kajs do roboty. Po tym roku dopiyro konczyli my ostatni trzi lata. Jo na tyn rok byl w Ustroniu. Miyszkol zech tam na farze a za plotym my mieli kaplica ewangelicko i pastora. Pamiyntom te sluby, abo pogrzeby, abo jeszcze co innego, kiedy w kosciele bylo fifty-fifty katoliki i ewangeliki - i szlo to jakos.

W Moldawii 90% abo i wiyncy to som prawoslawni. W takim Kiszyniowie je kole 80 cerkwi prawoslawnych a yno jedyn kosciol (za to w samiutkim cyntrum). Miasto je dosc wielki (ponad 800 tys. ludziow). Nikerzy, jak jadom do kosciola, to muszom autobusami abo trolejbusami jechac prawie godzina i pora razy sie przesiodac. Jo, jak we piyrszy piontek jada odwiydzac chorych, a ni mom ich zas tak duzo, jakis 10-15 chorych, to po miescie robia prawie 70 km. 

Ale chciolzech tyz napisac trocha "ekumynicznie". Jak je "Tydziyn Modlitw o Jednosc Chrzescijan", to u nas w kosciele zykomy zawsze razym z prawoslawnymi. Zapraszom do nos zawsze jakigos ksiyndza prawoslawnego (niy godejcie: "Pop", bo to je lekcewazonce i obrazliwe) i jego parafian, i wtedy rychtig to je pykne zykani. Prawoslawni majom taki swoi, specyficzne "cerkowne" piesniczki, my spiywomy swoji. "Ojcze nasz..." zawsze na koncu spiywomy razym. Roz, pamiyntom, ze Ksiondz prawoslawny godol u nos kozani - doprowdy piyknie pedziol. A na pogrzebach, chrztach, slubach, to zawsze w kosciele je duzo wiyncy prawoslawnych, niz nos, bo to zawsze przidom i somsiady i znajomi.

Zas zech sie rozgodol - wyboczcie.

Pozdrawiom wszyskich lod serca. Sponboczkiym. Olek.

 

 

Kochani Krzinkowicze! Serdecznie Wom dziynkuja za zainteresowani kiszyniowskim kosciolym i naszymi parafianami.

Pytocie sie, co jo na to?

Co tu ukrywac, my sam na razie mogymy zyc i robic yno dziynki pomocy dobrych ludzi. Sami my nie som w stanie utrzimac parafii. Nie myscie se, ze jo kwynkom i biadola. Niy, nic takigo! Ale, pedziec prowda, to my sam ni mogymy w ciongu calego roku uzbiyrac ani na to, zeby ogrzoc kosciol i fara bez zima. Niy godajonc juz o inkszych rzeczach, takich koniecznych jak sztrom, woda, gaz i jedzyni. A przeca „niy yno chlebym zyje czlowiek."

Ale do rzeczy. Sprawa wyglondo tak. Sytuacja bankow tu je tako ze, owszym som, ale jeszcze niy funguje to tak, jak by to mialo być. Momy konto w banku, ale to je „darymny futer”. Jakby ftos wplaciyl na te nasze konto jakos waluta zachodnio, to oni to zarozki zamiyniajom na leje. A to nima nic we wercie, bo tyn piniondz miejscowy tak skocze, ze może byc tak, ze wpalci ftos dzisiej np. 50 DM, a jo tu w lejach byda tego jutro miol 20 DM. Tu sie na razie oplaci yno trzimac piniyndze we fusekli. To po piyrsze. A po drugi – w praktyce wyglondo to tak: Jo zalozyl konto w Polsce. Starom sie byc chocioz roz w roku w Polsce i wtedy z tych piniyndzy, co sie tam w tym czasie uzbiyrajom, kupuja roztomajte rzeczy, co sam ich nie idzie dostac.

Wy sie dziwicie, ze ni momy sam ancugow do ministrantow. Musicie wiedziec, ze tyn kosciol, co w nim teraz robia, bol przez 30 lot zawarty. W 1991 dali go nom nazot, ale byl on colkiym pusty. Ani lawek, ani oltorza, ani spowiedalnic, kompletnie nic. Poleku jakos nom sie udalo zdobyc duzo rzeczy: ornaty, kielichy i mszaly jakos my zorganizowali. Kto, co umiol, to prziwoziyl. Sporo jeszcze rzeczy jeszcze ni momy, to fakt. No wiync jo, jak zech je w Polsce to kupuja: monstrancjo, kielichy, ornaty, komunikanty, doprowdy wszystko.

Ale som tyz rzeczy, co trzeba kupic tu na miejscu. Roz na miesionc, moj brat, co mjyszko w Rybniku, dostowo z banku stan mojigo konta. Jak, cos wiynkszego musza kupic na miejscu, to dzwonia do niego i on mi godo wiela tam je piniyndzy. Jo wtedy moga sam pozyczyc, bo wiym, ze, jak byda w Polsce, to prziwieza i byda miol z czego oddac.

Jak tu mialy przijechac zakonnice z Polski, toch sie dowiedziol przez telefon, wiela mom i kupowolzech sam wszystko (nawet talyrze, szolki i gorki do kuchnie).

Nie chca Wos tym wszystkim zanudzac, ale jakescie sie mie spytali, to Wom godom, jako tymu je.

W kazdym razie je zech Wom fest wdziynczny i mysla se, zeby za wszyskich Krzinkowiczow lodprawic Mszo Swiynto. Jakescie som za, to dejcie znac, a jo Wom potym powiym kiedy by to moglo byc.

To tela, bo ostatnio i tak, cos za duzo nic yno o siebie godom.

Pozdrawiom wszyskich lod serca. Trzimejcie sie tam jako. Sponboczkiym. Olek.

 

Konto: Bank Slaski Katowice II o/ Rybnik
10501344-403382310
W dniu 11.02.2000 r. wplacilech na konto Olka 1.743,01 PLZ 
jeden tysiac siedemset czterdziesci trzy 01/100 złote
[kwota waluty DEM 850,00; kurs: 2,050600] 
Wpłacający: Ślonskie Beranie; 
Tytuł wpłaty: Kościół w Kiszyniowie

Wszystkim co sie sciepli piyknie dziynkuja - Maniuś 

Wielki Bog zaplac za to, coscie wciepali do koszyczka na Kiszyniowsko Katedra. Som niy wiym, jak sie byda mog odwdziynczyc? Szczegolnie se mom w zocy te datki, bo wiym, zescie je sciepowali w goroncym okresie przedswiontecznym, a jaki wtedy som wydatki kozdy dobrze wiy. Niych Wom Ponboczek wynagrodzi! ks. Olek

Piesniczka pionto "Victoria Moldavia"
- spiywac na nuta Glori, glori,Aleluja

1.Olek nojlepszym naszym przijacielym jest
serce jak kachlok gorkie wylyczy Ci stres
Z serca nucymy do Cia Olku spiywka ta
Ty nom mocka przajesz pra?

Ref:
Jak Ponboczku Ci dziynkowac,
ze jo poradza rymowac
beztoz chodzi mi po gowie
piyrszy Biskup w Kiszyniowie

Glori, glori Aleluja
jo z Moldawiom sie raduja
piyrszy biskup niych nom zyje lot sto
Olku sprow za niego mszo.

2..Biskup nojlepszym naszym przijacielym jes
serce jak kachlok gorkie wylyczy Ci stres
Z serca nucymy do Cia Olku spiywka ta
Ty nom mocka przajesz pra?

3.Moldavia nojlepszom naszom przijaciolkom jes
serce jak kachlok gorkie wylyczy Ci stres
Z serca nucymy do Cia Olku spiywka ta
Ty nom mocka przajesz pra?

4.Krzinka nojlepszom naszom przijaciolkom jes
serce jak kachlok gorkie wylyczy Ci stres
Z serca nucymy do Cia Olku spiywka ta
Ty nom mocka przajesz pra?

zakonczynie
Bydzie fajer a szykowny
do karlusow bierzmowani
Sla Biskupie Ci cudowny
z Pszowa usmiych Naszyj Pani.

We Pszowie jes cudny lobroz Matki Boski Usmiychniynty jak mje przijedziecie nawiedzic to se lobejrzycie  

Ściskom Wos moc Janek ze Pszowa